Lingua de namorar 2020

image_galleryConcurso en liña de mensaxes de amor coorganizado pola Secretaría Xeral de Política Lingüística e a Dirección Xeral de Xuventude, Participación e Voluntariado.

Está dirixido a mozos e mozas de 14 a 35 anos que, para achegar as súas propostas, só terán que cubrir o formulario de participación. Cada participante poderá enviar un máximo de dúas mensaxes de ata 350 caracteres escritas en lingua galega, ben en prosa, ben en verso.

Categorías de idade e premios

Establécense dúas categorías:

  • Categoría A: mensaxes escritas por autoras e autores que teñan entre 14 e 19 anos.
  • Categoría B: mensaxes escritas por autoras e autores que teñan entre 20 e 35 anos.

Haberá tres premios por cada unha das categorías de idade:

  • 1° Bicicleta pregable NILOX X2 Plus Motor 250w Roda 16” Autonomía 25 Km.
  • 2° Tablet LENOVO ZA470057SE. 10,1” – 2/32 XB – Cámaras frontal e traseira.
  • 3° Cámara deportiva SUNSTECH Adrenaline. Vídeo 4K/30FPS. 16 Mp wi-fi.

Prazos de participación e de votación

O prazo para enviar as mensaxes remata o luns 9 de marzo.

Do 10 ao 13 de marzo abrirase o período de votación. As persoas que desexen votar polas súas mensaxes favoritas deberán cubrir o formulario que se habilitará para o efecto.

Xurado e resolución

O xurado do concurso reunirase unha vez rematado o prazo de votación e elixirá as declaracións gañadoras de entre as 50 declaracións máis votadas polos usuarios e usuarias en cada unha das categorías de idade.

No mes de abril terá lugar a entrega de premios do concurso.

Escribir poesía con Carlos Negro

A POESÍA é como o chocolate: breve, intensa e cun doce de amargura.

Carlos Negro ten a virtude de achegar a poesía aos e ás adolescentes para que a saboreen e a desfruten, como do chocolate.

Os nosos rapaces e rapazas de 3º da ESO escoltaron, riron, crearon e recitaron poesía en galego.

Grazas Carlos por este encontro!

Concurso de microrrelatos da RAG e PuntoGal

Captura de pantalla 2020-02-11 a las 12.45.46

A Real Academia Galega e PuntoGal convocan o III Concurso de microrrelatos, que premiará un ano máis os mellores textos de ata 200 palabras nas categorías:  xuvenil e persoas adultas. 
O prazo de presentación dos textos permanecerá aberto todo o mes de febreiro.
As bases do concurso están dispoñibles  NESTA LIGAZÓN.

Día de Rosalía

5-acuarela-rosalaia_1

Como estes últimos anos a AELG (Asociación de Escritores en Lingua Galega) convoca unha serie de actividades para conmemorar o Día de Rosalía. A proposta deste ano ten o lema:  #ErrantesPoloMundo_rdc20 e trátase de crear postais que escenifiquen os procesos migratorios actuais engadíndolles a pé de foto versos de Rosalía.

Neste curso o día 24 coincide coas festas do entroido, por iso será o venres 21 de febreiro cando amosaremos os traballos do alumnado do EDLG sobre a proposta da AELG.

Anímate a participar! Lembra que as imaxes non deben ter dereitos de autor/a.

Día da muller e a nena na ciencia

dia_mujer

Os departamentos de Física e Química, Lingua Galega e Plástica organizan para a semana do 10 ao 15 de febreiro unha exposición de mulleres galegas científicas e un concurso para atopar faltas de ortografía nos carteis (feitos polo alumnado de 2º e 3º de ESO).

Para participar colle o teu impreso en conserxería, cúbreo e deposítao na caixa de respostas. Cada día elixirase unha das papeletas como gañadora;  o premio será un bocata e unha auga gratis na cafetería.