A lingua bota a andar no Aquis!

Este pasado martes 27 de setembro puxemos en marcha, un ano máis, o Equipo da Lingua no noso instituto. Unha marea de mozas e mozos xunto cun grupo de profes xuntámonos durante a hora de xantar para presentármonos e presentar cales van ser os eixos do noso traballo.

Foi un encontro que nos encheu de forza para afrontar o curso porque temos moita xente nova e de todos os cursos, dende 1º da ESO até 1º de Bacharelato. Aproveitamos esta primeira xuntanza para poñer en valor o traballo feito no noso centro o curso pasado a través do proxecto interdisciplinar Poesía para pasear o mundo, intimamente relacionado con dúas datas sinaladas que abrían e pechaban esta semana: o Día Europeo das Linguas e o Día Internacional da Tradución. Demos un marabilloso paseo pola beira do Umia e achegámonos ata o Banco da Poesía que desde finais de xullo está na zona da Tafona. Comprobamos que o código QR que hai no banco nos permite acceder, a través do noso idioma, á poesía creada en moitos lugares do mundo e tamén a unha escolma de poetas galegos/as. Para rematar a visita lemos un dos poemas seleccionados no proxecto.

Así pois, comezou o curso e activouse o Equipo da Lingua!

• 

• 

• 

De Rosalía a Florencio Delgado Gurriarán

O Equipo da Lingua está presente, e colabora ao longo de todo o curso co Equipo da Biblioteca e con outros departamentos, nas actividades de fomento da lectura e de celebración de efemérides que prestixian a nosa lingua.

Este ano, logo de ser xa celebrado desde hai anos pola comunidade educativa, fíxose oficial no calendario dos centros de ensino o Dia de Rosalía. E viña con sorpresa, pois a data que agora ficará establecida para a celebración será o 23 de febreiro (no canto do 24) grazas ao recente estudo da investigadora Sagrario Abelleira.

Nós reivindicamos á poeta lendo os seus versos e, grazas á intervención do Departamento de Educación Plástica co alumnado de 4º da ESO, seguimos engalanando o noso centro con creacións artísticas en gran formato que lembran o seu valor fulcral na nosa literatura.

E logo de participar en abril no Camiño dos Libros que coordinou o Equipo da Biblioteca, chegamos á data central das nosas letras.

O compromiso de Florencio Delgado Gurriarán co galego é tamén un exemplo para quen conformamos este Equipo da Lingua. Non é un compromiso dun día solto ao ano senón diario e continuado coma o que mostraron rapazada e profesorado ao longo deste curso.

Nos días previos ao 17 de maio colocamos no instituto a exposición cos carteis sobre a vida e a obra do poeta valdeorrés que homenaxeamos neste 2022. Como achega propia, de novo o Departamento de Plástica, co alumnado de 4º da ESO, agasallounos con dúas magníficas montaxes gráficas sobre o autor de Galicia infinda.

dav

dav

dav

dav

dav

Semana da Ciencia en Caldas de Reis

En maio, a ciencia tomou as rúas da vila! A comezos de mes, o noso alumnado, co estímulo do profesorado de varios departamentos, fixo visible a importancia de trasladarlle á cidadanía o papel da ciencia nas nosas vidas, así como a necesidade de poñer en valor a achega imprescindible das mulleres de onte, de hoxe… e das de mañá.

sdr

sdr

sdr

E no Aquis tamén temos claro que a divulgación científica é unha ferramenta fundamental na normalización do idioma.

Programa 2 22. Ferven as Ondas. Marzo

Novo programa do Equipo de Lingua do Aquis. Gravado na sala “Ferven as Ondas” entre febreiro e marzo. Nesta nova entrega goza de música galega, entrevistas, reportaxes, recomendacións e todo o que debes saber como celeno/a…Dende o Aquis na túa lingua!

A Candeloria: casan os paxaros … e o alumnado toma a palabra!

Desde o Equipo da Lingua queremos parabenizar a iniciativa de varias alumnas de 1º de Bacharelato (especialmente a Catuxa e a Emma) por promover, con moi pouco tempo pero moito esforzo, ilusión e acerto, a celebración da Candeloria como ferramenta dinamizadora do uso do galego no noso centro.

A resposta do alumnado a este convite foi masiva e, o pasado 2 de febreiro, a caixa do correo disposta para o evento encheuse de mensaxes diversas canto a persoas destinatarias e a concepcións do amor.

O alumnado do Aquis tomou a palabra e quixo mostrar o seu amor … tamén á lingua!

Un trimestre ben intenso para o Equipo da Lingua

Levamos case tres meses de xuntanzas e o Equipo da Lingua non parou de traballar para que o galego seguise a estar ben presente na vida do noso centro.

Cada dúas semanas, os martes á hora de xantar, contamos co pulo de mozas e mozos (ao redor de 20 en cada xuntanza) que achegaron o seu entusiasmo e esforzo á preparación do primeiro programa de radio de Ferven as ondas neste curso 21/22. A situación do idioma, a música que nos presta, a denuncia do machismo que nos arrodea, a descuberta de lugares que nos poden marabillar, … todo iso interesou e ocupou ás reporteiras e aos reporteiros do Aquis.

Neste derradeiro día de clase do ano 2021 presentamos a todo o alumnado do centro (grupo por grupo) o noso traballo e convidámolo a formar parte dun Equipo que pretende que a nosa lingua sexa unha realidade viva, moi especialmente entre a xente nova.

Boas vacacións, celenas e celenos!

dav

dav

sdr

dav

Somos Equipo! Vídeo de presentación do Equipo de Lingua

Novo programa do Equipo da Lingua 12-21. Ferven as ondas.

Programa especial de decembro do 21, con entrevistas, música, reportaxes, recomendacións e moito máis para gozar da vibración das ondas celenas. Ferven as ondas!!!

Arranca de novo o Equipo de Normalización da Lingua!

O pasado martes 28 de setembro comezou o traballo do Equipo da Lingua neste curso 2021-2022.

Ademais de profesorado, vinte alumnas e alumnos quixeron implicarse na tarefa de seguir afondando na identificación do Aquis Celenis co prestixio da lingua a través da creatividade, a innovación, … 

Presentáronse as liñas de traballo para os seguintes meses: implicación no proxecto interdisciplinar Poesía para pasear o mundo, na radio Ferven as ondas, na revista Ruxe Ruxe, en campañas e actividades de promoción da lingua (propias ou da Coordenadora comarcal): o voluntariado lingüístico, a Semana das Letras, a Festa da Lingua, …

Se queredes achegar algunha suxestión ou proposta podedes facelo:

Asistindo as xuntanzas que teremos os martes á hora de xantar, cada dúas semanas, no propio centro. O Equipo está sempre aberto a novas incorporacións!

A través do noso enderezo de correo electrónico: aquisfalamos@gmail.com

En Instagram: @aquisfalamos

Avante coa lingua!

• 

  dav

• 

  dav

• 

  dav

• 

  dav

• 

  dav

Programa de radio sobre Xela Arias

Dentro das actividades realizadas no Aquis para a celebración do Día das Letras, o alumnado de 1º ESO traballou arreo para crear este fantástico programa sobre Xela.

Escoitade, escoitade!